ماچۆ جه شارو پاوهی که فرهتهر جه 60-70 جهسهد و خهلکی هۆرامیێنێ و بنهرهت و شارهکهیچ هۆرامین چی ؟ چی بشۆم سۆرانی قسێ کهرمێ ؟ چی ئێمهی هۆرامی بشۆم چهنی ههر کۆردێ یا ههرکهسێ چی ولاتهیه قسێ و دیالۆگ کهرمێ بشۆم بلمێ سهرو زوانو ئادی و ویرما بشۆ که ئێمه هۆرامیێنمێ . . . چی ئهگهر ئهرهنیشتێوه سهرو زوانو و شێعرو هۆرامی گێریۆ بشۆم سۆرانی قسێ کریۆ و جگه شێعرهکا کهلیمێ هۆرامی نهواچیۆ پاسه که سالۆ پاری جه کرماشان دیما ؟ چی وهختێ جه بهرنامێوه تهلهفزیۆنی کهسێوه بهنامێ رۆشنویر و نویسهری کۆردی قهرارا سهرو زوانی هۆرامی دلێ بهرنامێوه هۆرامی و پێ خهلک و هۆرامانی قسێ کهرۆ , مهتاوۆ و مهزانۆ هۆرامی قسێ کهرۆ !؟ وه ئایا چی ئهچی گرد بهرنامه تهلهفزیۆنی کۆردیانه جارێشا مۆجری بهرنامێوه داواش نهکهرده که وینهری هۆرامی به هۆرامی و به زوانو وێش راو نهزهرهش واچۆ یا ئهسلهن ئێمهی هۆرامی چی ئهچی جۆره بهرنامانه ویرورا و وێما به هۆرامی مهواچمێ و پێسه فارسێ ماچا دهس و پا مهریا گهرهکمانه سلێمانهیی ! قسێ کهرمێ !فرهو وهختایچ مهتاومێ مهنزورو وێما مهیاونمێ ؟ . . . چی ؟
جواب مهدۆوه . . . فرهتهر پهرسهکاش تهماشه کهرو و فیکرشا سهرۆ کهرو . واچو خهتاو وێمانه ؟ واچو خهتاو دهسهلات و حکومهتانه ؟ واچو چێش؟ . . . مهزانو !!؟؟
کهنوله ( کندوله )یا خاستهر واچمێ هۆرامانو کهنوله یا خۆ هۆرامانو دینهوهری که کۆتهن تهقریبا 100 کیلومتری وهرکۆت ( شرق ) و شارو کرماشانی چند دهگێ وهش و ئاوهدان و پهرجه باخێنێ . فرهو خهلک و کهنولهیچ چند ده سالێن بۆنۆ سهختی ژیوای و نهبیهی دهرئامهدی مۆناسب راو کۆچ پێ شاره گۆرهکا ( پێسه کرماشانو و تارانیشا ) گرتهنو فرێشا ئیسه جه سمهتێ ( یاگێ ) دهولهتی و نظامی و دانشگاهی و ههرپاسه تجاری خهریک و ههرمانێنێ . ژمارهو کهنولهییهکا شارو کرماشانی ژمارێوه چند ههزار نهفهرین جۆرێ که ئیسه خهریکێنێ یۆ جه گۆرهتهین مزگییهکا کرماشانی به نامێ وێشا کهراوه ! بهلام به داخۆ ئی نهسله تازهو جوانه جه کۆچ کهردهکا کهنولهی زوانشا بیهن به فارسی و ههرچند ئهداو تاتهشا چهنی یۆترینی هۆرامی ( یا پێسه وێشا ماچا کهنولهیی ) قسێ کهرا بهلام وێشا چون ههر جه زارۆلهیۆ فارسی قسێشا چهنی کریان مهزانا یا گێره گهرهکشا نیا هۆرامی (کهنولهیی ) قسێ کهرا . تهنیا ماچا کهمێ حالیما بۆ !!. چی وهزعێنه وهختێ چهنی جوانهکاشا قسێ کهری شۆقێوه پێ زوانو فهرههنگ و وێشا وینی که جه نهبیهو یاگێوه پێ نیشان دایش و بهرکۆتهیش شاریانۆ و هۆمێد که نهکۆشیۆوه . . . .
نزیک و ویس سالێ چێوهل وهختێ هۆرچنیهکێ پارلمانی ئیرانی جه پاوه و هۆرامانات نزیکێ گنێنێ , یۆ جه ئا کهسا که وێش پێ هۆرچنیای حازر کهرێ و جاری وهلین نمایهنده ! و خهلکی بیهبێ نویستش که ئهگهر من هۆرچنیهو ...جادهکهو کرماشان-پاوه ی و " بالعکس " که ئا روه تا ملهپالنگانه یاوابێ تهمام کهرو و قیروگونی ش !!! کهرو , حهرگیز نێ خیالماره که ئی قسه زانایانێ ! که ئا روه بیێبێ نۆقل و شهونشینی خهلک و پاوهی ویس سالش بێ ملهرهو جادهکه تا قشلاخ یاوو و " بالعکس " یچ تر هیچ !!بهلام بێ گالته واچمی پاسه مزانو که گێره ( شاید ) لکه ( گره ) و وهرهولوای ( پیشرفت ) پاوه و لهۆن و ئێرانی سهرهکویایهکهو مهستورئاغهی و پێچهکا شمشیرینه نه گیرش گهرده بۆ .
دهی با گهرهکما بۆ که ئی لکێ ( گرێ ) کریۆوه !! .
هۆرامان پێسه کۆنه یاگو فهرههنگ و تهمهدۆن و بهشهری دنیێ و پێسه یاگێ ههمیشه سهربهخۆ , ههمیشه و میژوی پهر بیهن جه پیاو ژهنه ژیرو زانایا جه گرد و بوارو ژیوای . جه هۆرامانی وهلێ ئیسلامی به کهسێ که جه ههر بوارێ ژیوای فرهتهرین ههرمانه ش وستهبۆ وهر چهم و ژیری و زانایی ش چا بوارانه پێ خهلکی بهر کۆتهبۆ واچیانش پهنه ( پاور ) . گێره کهلیمێ " پیر " ی که ئارۆ ههر دوه زوان و کۆردی و فارسی به کار ملۆ جه "پاور"ی هۆرامی ئاما بۆ که دمایی بیهن به پیر ! . وهلێ ئیسلامی , هۆرامان 99 پاور ( پیر ) ش بیێنێ که ههرکامشا جه بوارێ جه ژیوای هۆرامان و ئاوهختیه ژیر و زانا بیێنێ . پاسه که ماچا و ئێمه ژنیهنما 99 پیرو هۆرامانی .
جمعهی وهلین بۆنۆ قۆمێ که نهوهش بێ لوانێ پێ بیمارستانو پاوهی . چینهی که بیمارستانو پاوهی 37 سالێن خزمهتێ گۆره به شارو پاوهی کهرۆ و به دلسۆزی دۆکتۆرو کارمهنده وێمانا تاوانش بهشێ جه نیازی دهرمانی هۆرامانو پاوهی جواب بدۆوه یاگێ دهس وهشی و رێزو ئێحترامین . بهلام . . . بهلام ئارۆ که تهماشهو کتێب و (تاریخ سیاسی اجتماعی پاوه) هی کهرێنا . چهمێم وست پهل و 15 ی که ئیشاره کهرۆ به سهروهنهدای ساله و 1355 یانێ 29 سالێ چێوهل و شا و وهخت و ئێرانی محمدرضا شاه جه بیمارستانو پاوهی که چا زهمانهنه نامێش بیمارستان و شیر و خورشید بیهن . بهلام ئاچێوه چێنه پێ من ههمیهتش ههن ئینهن چی پهل و ئی کتێبیهنه دوێ جوملێ جه زوانو رهیسو ( جمعیت شیرو خورشید ) و وهختو کرماشانی نویسیان که ماچۆ ئی بیمارستانه ( پاوهی ) سالۆ 1347 بهچل تهختی کریانۆ و ئیسه یانێ 1355 یاوان شهس تهختێ و ههر چاگه ماچۆ که جه ئایندهی فره نزیکهنه بۆ به بیمارستانی سهد 100 تهختی . بهله ئینه باسو 29 سالێ چێوهلین . ئایا ئارو دمای نزیک به سی سالێ حهق ما نیا پهرسمێ چی بیمارستان و پاوهی ههلای حهر بیمارستانێ 60 تهختین ؟ وه ئایا دمای نزیک به چل سالێ جه ههرمانۆ ئی بیمارستانهیه , منتهقهو دورهدهس و هۆرامانو پاوهی نیازش به بیمارستانێ گۆرهتهر و خاس و تازهتهر نیا ؟
حهتمهن ههنش .
کابرێوه هۆرامی خه لک و یۆ جه لادهگاکا هۆرامانی گۆنیێ وهزی دزۆ . دماو بهینێ کابرای دز رسوا بۆ .دز جه خهجالهت و دزی وێش کۆچ کهرۆ پێ شارهزوری ! و ویس سالێ چا مهنۆوه و روهو هۆرگێلایش مه بۆ !. دمای ویس سالا به خیال و ئینهی که خهلک و دهگاکێ دزیهکهشا ویر شیهنۆ گێلۆوه پێ هۆرامانی ! که گێلۆوه پێ ده گاکێ گرد کهس خهبهردار بۆ که کابرای دز هۆرگێلانۆ , وینۆ که دزی ئی کابرایه پێسه چێوێ فره گۆرهی بیه ن به بنهرهت و تاریخی پێ چێوه مهیمهکا ئا دهگێ ! , مهسهلهن ماچا کۆرهکهم پهنج سالێ دمای دزیهکهی پێدا بیهن . یا ساله و دزیهکهی فلانه زهمینم ئهسان !!. دزی ئی کابرایه چون تهنیا دزی ئی چند سالهیه بیهن ویرو خیالو خهلکی مهنهن و ویرشا نهشیهن !!!.
فرهسالێ وهلێ ئیسلامی , ئێداره و هۆرامانی شورایی بیهن ! . گێره برهجیۆتا گالتهکهرو . . . بهلام بهراسی نا . شورێ وه , که به هۆرچینیای خهلک و شارو دهگێ هۆرامانی هۆرچنینێ . ئا کهسێ کهپێ شورێ نامێ نویسێنێ و وێشا حازر کهرێنێ پێ هۆرچنیای خهلکی , ئهشیا چند سالێوهخزمهت و خهلک و ئا دهگاو شارهیشا کهردهبیێ و لیاقهت شا پێ خهلکی بهر کۆتهبیێ . شورێ وهکهجههۆرامانهنه هۆرچنیان و تاومێ واچمێ مایهو شانازی پێ هۆرامان و هۆرامی ن " مهرێ " ش پهنهواچینێ . کهجهفرهو شار و دهگێ هۆرامانی یاگێ یا یاگانێ بهنامێ مهرێ ههنێ پێسه " مرۆ مهرێ " جهدزلی , " چهمهو مهرێ " جهکهماله و ههر پاسه" دهرهو مهرێ " جهزاوهر .
راسی " مهرێ " هۆرامانی پێ چوار سالا هۆر چنینێ !.هۆر گرتهو هۆرگێلنای جه"تاریخ سلاطین اورامان " ص 54
شماره یهرێ وهرزنامه و هۆرامانی به زهحمهت و کاک ئاسۆ بیارهی جهسوێد جه ئینترنت وهلا بیۆ . دهسش وهش . بهراسی کاک ئاسۆ بهگردیما نیشانهش دا که کریۆ دور بی , تهنیا بی , بهلام دلسۆز بی و خهم و فهرههنگ و زوانو کۆن و وێت وهری و ههرمانێ گۆرێ کهری . ئارۆ وهختێ چاپ کریا و هۆرامان یم نیشانۆ برێ کهسا جهپاوهنهدا . چیوی وهشم چهم پهنه کۆت یهرێ مهد رهسهیێ بهشۆقێوه فره دماو تهماشه کهردهو وانایش ماتلێ بێنێ مهجهلهکهی دما و تهعتیلی جمعهی بهراوه مهدرهسهو نیشان و رهفێقهکاشا بدا . یۆشا واچێ با نیشانۆ . . . جافی (سۆرانی زوانی ) ش دهو تا بزانۆ ئێمهیچ ههنمێ !!!!!!!
به راسی چند رهحهت تاومێ به وێما و کهسانی تهر نیشانه دیمێ ئیمهیچ هه نمی !!
مهزانو چند سالێ چێوهل بێ . بهلام زانو سالان و سهرهتاییم بێ . روێ وهلێ جهژنێ ئهدام سهرهم شۆرێ و لیباسێ تازێم کهرێنه ( ئاخر تاتهم چا روا جهژنێ لیباسێ تازێ م پێ ئهسانێ ) . . . ئا شهوێ من بهماتلی سهوایۆ ئوسێنا . رۆ جهژنێ , ساحبی زو بهدهنگ و بلهنگۆ کهو مزگی " اللهاکبر . . . و للهالحمد " وهرمهنه هۆرزێنا . تهماشێوه یانهکهی کهرێنا دوه چاشت و جهژنی سهرو ئایر یۆ بێ ! تاتهم لوان پێ مزگی پێ نماو جهژنێ ... ئهدایچم لوێنهسهرو زیارهتی . ئاخر دوی سالی چیوهل دوێ برێ ش عهمرۆ خۆدایشا کهردینه....سهعاتیش پهنه مهشو تاته مزگی و ئهدا سهرو زیارهتیۆ مهیاوهو دماو نان واردهی و جهژنانه گرتهی جه تاتهی گردیما پێوه ملمێ پێ یانهو مامێ م .
چا سالانه جهژنه بهراسی جهژنهبی پهر جهوهشی و وهشهسیایی . . . .
پێ من ئارۆ جهژنهپاسه نهمێنه. . . پێ شمه مهزانو . . .
ئارۆ وهختێ تهماشێوه پهلیانه هۆرامیهکا کهرێنا برێ پهلیانێ تازێ و رێک و پێکم دیێ که ئهگهر چی فارسی نویسیێنێ بهلام بهراسی یاگێ دهس وهشی نێ !پالو وهشحالی پێدا بیهی ئی پهلیانا دوێ چێوێ کهفره مدۆ چهمهو تاوۆ یاگی نیگهرانی بۆ یۆشا ئینهن کهبهداخۆ مهتلهبێ تازه که وهشکریاو ویرو فێکرو ئا پهلیانهیه بۆ مهوینمێ یا کهمتهر وینمێ . جۆرێ کهتاوی واچی تهمام و ئی پهلیانا یهک قالب و یهک جۆرهمهتلهبێ شا ئینا دلێنهو کهمتهر وینمێ کهئی پهلیانێ بهویرو فێکرو وێشا ههزاران مهتلهبێ دۆر و بهریشا وزا وهر چهم و بهقهلهم وێشا دلێ ئا پهلیانانه باراش !
دو : نهپارێزنای ئهمانهت و نویسهی . پی مانا کهگرتهو مهتلهب عهکس و . . . بێ ئانهی ئیشارێ بهنامێ سهرچهمهو نویسهر ی ئهسلی ئا مهتلهبهیهکریۆ
بهههر حال بهویرو من بشۆم وێما بنویسمێ یا ئهگهر مهتاومێ ئهمانهتداری کهرمی !